Qayerda: O’zbekiston

Ariza topshirish muhlati: 2018-yil 1-mart

Grant turi: tanlov

Kim uchun: barcha uchun

O‘zbekiston yoshlar ittifoqi va Respublika yosh ijodkorlar kengashi “Buyuklar biz bilan” videoroliklar tanlovini e’lon qildi. Bu haqida Respublika yosh ijodkorlar kengashi xabar berdi.

Mazkur tanlov Alisher Navoiyning 577 yilligi va Zahiriddin Muhammad Boburning 535 yilligi munosabati bilan, xalq orasida ularning ijodini keng targ‘ib qilish va oilalar, korxona va ta’lim muassasalarida ulug‘ siymolarimizning boy ijodiy merosi bilan yaqindan tanishtirishga ishtiyoq uyg‘otish maqsadida tashkil etilmoqda.

Tanlov ikki nominatsiya bo‘yicha tashkil qilinadi:

  • “Eng yaxshi g‘azalxon oila” va
  • “Eng yaxshi g‘azalxonlik kechasi”.

“Eng yaxshi g‘azalxon oila” nominatsiyasida ishtirokchilar o‘z oila a’zolari bilan birgalikda Navoiy, Bobur va boshqa g‘azalnavis shoirlar g‘azallarini yoddan o‘qib, tasvirga muhrlashi lozim.

“Eng yaxshi g‘azalxonlik kechasi” nominatsiyasida oliy va o‘rta maxsus ta’lim muassasalari, umumiy o‘rta ta’lim maktablari, maktabgacha ta’lim muassasalari, mehribonlik uylari, shuningdek, turli korxona va tashkilotlar doirasida o‘tkazilgan g‘azalxonlik kechalarining tasviri tushirilgan videoroliklar ishtirok etishi mumkin.

Ishtirokchilar tanlovda quyidagi usullar orqali qatnashishlari mumkin:

  • 1) videoroliklarni Telegram messenjeridagi @ijodkormatbuot profiliga yuborish orqali;
  • 2) ijtimoiy tarmoqlarda (Youtube, Facebook, Instagram, Odnoklassniki) #buyuklar_biz_bilan, #yoshijodkor heshteglari ostida qo‘yilgan videoroliklar orqali. Faqat bunda ishtirokchilar ijtimoiy tarmoqda qo‘yilgan video uchun havola (link) manzilini Telegram messenjeridagi @ijodkormatbuot profiliga yuborish tavsiya etiladi;
  • 3) CD yoki DVD disklarga yozilgan videoroliklarni “100096, Toshkent shahar, Qatortol ko‘chasi, Ma’muriy hudud binosi, 60-B uy” manzili bo‘yicha Respublika yosh ijodkorlar kengashiga yuborish orqali.

Yuqoridagi uchta usul teng kuchga ega va ishtirokchilar uchun bir xil imkoniyat taqdim etadi.

Videoroliklar 2018-yil 1-mart kuniga qadar qabul qilinadi hamda g‘oliblar joriy yilning 21 mart kuni e’lon qilinadi.

Tanlovda g‘olib deb topilgan videoroliklar mualliflari quyidagicha mukofotlanadi:

  • 1-o‘rin – zamonaviy kompyuter jamlanmasi;
  • 2-o‘rin – noutbuk;
  • 3-o‘rin – planshet.

Mazkur mukofotlar har bir nominatsiya bo‘yicha alohida topshiriladi.

Shuningdek, eng sara videoroliklar “Yoshlar” va “MY5” telekanallari orqali efirga uzatiladi.