Tanlov.uz - конкурсы, гранты, события » Ташкилотлар

“Iste`dod” jamg`armasi

m.turdalieva — Sat, 29 May 2010 04:38:58 +0000

“Iste`dod” jamg`armasi O`zbekiston Respublikasi Prezidentining istiqbolli yosh pedagog va ilmiy kadrlarning malakasini oshirish maqsadida 2003 yilning 1 iyulida O`zbekiston Respublikasi Prezidenti Farmoniga muvofiq tashkil etilgan.

Jamg’armaning asosiy maqsadlari mamlakatimizning intellectual salohiyatini, fan, pedagogika va iqtisodiyotimiz rivojlanishi darajasini jahonning eng ilg`or ilmiy izlanishlari va yuqori texnologiya yutuqlari darajasiga ko`tarish, O`zbekistonda chuqur tarixiy ildizlarga ega va respublikamiz taraqqiyoti uchun muhim bo`lgan ilm-fan yo`nalishlarining barqaror rivojlanishini ta`minlashda faol ishtirok etish, dunyoda e`tirof etilgan nufuzli oliy ta`lim va ilmiy markazlar bilan amaliy hamkorlik o`rnatish shuningdek, mamlakat ta`lim va ilmiy muassasalarida pedagogik va ilmiy faoliyat borasida muayyan yutuqlarga erishgan, ilmiy izlanishlarni boshlagan, yuksak ijodiy salohiyat va qobiliyat sohiblari bo`lgan istiqbolli yosh pedagog va ilmiy kadrlarning iste`dodini rivojlantirish,ularning Jamg`arma grantlari asosida taraqqiy topgan davlatlarning ilg`or ta`lim va ilmiy muassasalarida nazariya va amaliyotining zamonaviy yo`nalishlari bo`yicha malaka oshirish hamda maqsadli tajriba orttirishiga, O`zbekistonning barqaror rivojlanishi uchun ustuvor yo`nalishlar bo`yicha bilimini chuqurlashtirishiga, progressiv ilmiy izlanishlarda ishtirok etishiga ko`maklashish hisoblanadi. Shu kunga qadar “Iste’dod ” jamg’armasi dunyoning nufuzli oily o’quv yurtlari, jumladan Garvard Universiteti, Kembridj Universiteti, Vestminster Universiteti, Bonn Universiteti, Malaga Universiteti, LogMan Akademiyasi, Moskva Davlat Universiteti, Tokyo Universiteti va shu kabi boshqa o’quv dargohlari bilan hamkorlik aloqalarini o’rnatgan. 2003 yilning 26 avgustidan e`tiboran O`zbekiston Respublikasi Prezidentining “Iste`dod” Jamg`armasi qoshida Masofali o`qitish markazi tashkil etildi. Markazning o’ziga xos jihati shundan iboratki, u faoliyati davomida O`zbekiston Respublikasida fan va maorif tizimini rivojlantirish hamda modernizatsiyalash, jamiyat ehtiyojlarini qondirish, axborot texnologiyalarini tadbiq etish va rivojlantirish uchun sharoit yaratish hamda malakali, madaniy va axloqan rivojlangan yetuk kadrlar tayyorlash bilan shug’ullanadi. Bundan tashqari, jamg’armada axborot texnologiyalari va masofali o’qitish, innovatsion taxnologiyalar va ta’lim muassalari boshqaruvi yo’nalishlarida kurslar tashkil qilingan.

Gulhayo Qobilova

«Victor-Hugo» nomli Fransuz Madaniyat Markazi

m.turdalieva — Fri, 30 Apr 2010 07:21:35 +0000

O’zbekistonda turli chet tillarni mukammal o’rgatishni maqsad qilgan ko’plab til va madaniyat markazlari faoliyat ko’rsatimoqda. Mana shunday madaniyat o’choqlaridan biri«Victor-Hugo» nomli Fransuz Madaniyat Markazi hisoblanadi. «Victor-Hugo» nomli Fransuz Madaniyat Markazi bir vaqtning o’zida ham Fransiya haqida ma’lumotlar olish, fransuz tilini o’qitish hamda uchrashuv va madaniy aloqalar o’rnatish maskani hisoblanadi.

Mazkur markaz fransuz ma’muriy idoralari va talabalar o’rtasidagi bog’lovchi vositadir, xususan Fransiyada ta’lim olish masalalarida maslahat, ma’lumotlarga ega bo’lish hamda Fransiyada o’qishni istaganlarni baholash joyi hamdir. Fransiyada o’qishni istovchilar uchun va fransuz tilidagi bilimlarini mustahkamlamoqchi bo’lgan talabalarga Fransuz Madaniyat Markazi fransuz tili mashg’ulotlarini taklif qiladi. Mazkur til o’rganish mashg’ulotlarini zamonaviy maxsus metodika sohiblari bo’lgan o’zbekistonlik o’qituvchilar olib borishadi.Bundan tashqari, markazning fransuz tilidagi adabiyotlarga boy bo’lgan kutubxonasi mavjud.Mazkur kutubxona fransuz va rus tilidagi 10000dan ortiq romanlar va ilmiy-ommabop asarlar, 60ga yaqin fransuz gazeta va jurnallarga obuna bo’lib, 200tacha komikslar hamda 100dan ortiq CD, CD-Rom o’lchamdagi fransuzcha qo’shiqlar va qiziqarli dasturlar, 300dan ortiq VHS o’lchamidagi badiiy filmlar va 800tacha hujjatli filmlar, 100dan ortiq DVD o’lchamidagi badiiy filmlardan foydalanish imkonini beradi. Bu markaz o’zbekistonliklar fransuzlar hamda Shveysariya, Jazoir, Belgiyadan bo’lgan frankofonlar bilan muloqot qilish imkonini beradigan yagona joydir. O’zbekistonliklar tomonidan esa fransuz tilida so’zlashuvni ravonlashtirishga xizmat qiladigan muloqotlarga talab kattaligini e’tirof etish joiz. Markazda oyda ikki marta, shanba kunlari davra stoli tashkil qilingan. Bunda fransuz yoki frankofon o’z faoliyati yoki qiziqishlari haqida so’zlab berishadi. Aynan shu erda haqiqiy fransuz nutqini tinglashingiz va xorijliklarning Toshkentdagi faoliyati haqida tanishishingiz yoki frankofon mamlakatlar borasida ma’lumotlar olishingiz mumkin. Juma kunlari esa, fransuz tilida ravon so’zlashadigan talabalar bir piola choy va shirinlik atrofida frankofonlar maskani bo’lgan « Gyugo kafesi »ga taklif qilinadilar. Bu erga yo’l-yo’lakay Toshkentga qo’nib o’tgan fransuz sayohlari ham tarixiy O’zbekistonga qo’shimcha zamonaviy o’zbekistoliklar madaniyati bilan yaqindan tanishish maqsadida tashrif buyuradilar.

Gulhayo Qobilova

T.N.Qori Niyoziy nomidagi O’zbekiston Pedagogika Fanlari Ilmiy Tadqiqot Instituti

n.tursunova — Wed, 21 Apr 2010 04:33:49 +0000

Toshmuhammad Niyozovich Qori Niyoziy nomidagi O’zbekiston Pedagogika fanlari ilmiy tadqiqot instituti 1929 yil 17 yanvarda tashkil etilgan. O’z faoliyatini 1929 yil 15 iyunda Respublika Maorif xalq komissarligi tasarrufida Samarqand shahrida boshlagan. 1931 yildan O’zbekiston poytaxti Toshkent shahrida faoliyat ko’rsatib kelmoqda. Keyinchalik institut Madaniy qurilish institutiga, 1934 yildan esa undan uch mustaqil institut – O’z FA Tilshunoslik va adabiyotshunoslik instituti, Madaniyat ishlari tasarrufidagi San’atshunoslik instituti, Respublika Maorif xalq komissarligi tasarrufida O’zbekiston Pedagogika fanlari ilmiy tadqiqot instituti ajralib chiqgan.
Institut Respublikaning Xalq ta’limi sohasidagi ehtiyoji, jamiyatning ijtimoiy buyurtmasiga binoan O’zbekiston maktablar ilmiy tadqiqot instituti (1939 yildan), 1941 yildan Respublika Maorif xalq komissarligining metodik boshqarmasi va nihoyat, 1946 yildan xozirgi nomi bilan faoliyat ko’rsatib kelmoqda.
Institut 1991 yildan buyon Fan va texnika davlat komitetining, 2003 yildan esa Fan va texnologiyalar Markazining grandtlari bo’yicha ajratilgan moliyaviy ta’minot bo’yicha ilmiy tadqiqotlar olib boradi.
1967 yildan institutning Qoraqalpog’iston filiali tashkil etilib, bevosita region ta’limining dolzarb muammolarini tadbiq etib kelmoqda.
Institut tarkibida aspirantura (1960 yildan) va doktorantura (1994 yildan) bo’lib, u mamlakatimiz va qo’shni respublikalarni 13.00.01 – Pedagogika nazariyasi va tarixi hamda 13.00.02 – Ta’lim nazariyasi va metodikasi bo’yicha yuqori malakali ilmiy- pedagogik kadrlar bilan ta’minlab kelmoqda.

Institut huzurida faoliyat ko’rsatayotgan pedagogika nazariyasi va tarixi, xususiy metodika sohalari bo’yicha fan doktori (nomzodi) ilmiy darajasini himoya qilish bo’yicha ixtisoslashgan kengash mavjud. 1998-2006 yillarda mazkur kengashda 170 dan ortiq doktorlik va nomzodlik dissertatsiyalari himoya qilingan. Ular orasida bugun mamlakatimiz pedagogika fani ravnaqiga munosib hissa qo’shib kelayotgan yuqori malakali mutaxassislar bor.
Institutning oliy organi uning ilmiy kengashi bo’lib, unda Fan va texnologiyalar markazining davlat buyurtmasini bajarish ishlari nazorat qilinib, muntazam tarzda loyiha rahbarlarining hisobotlari, shuningdek, Xalq ta’limi vazirligining buyurtmalarini ijrosi haqida ma’lumotlar eshitilib boriladi, institut xodimlari, aspirant va doktorantlari, ilmiy izlanuvchilarning dissertatsiya ishlarining mavzulari, monografiya, darslik, o’quv va metodik qo’llanmalar, turli maqomdagi ilmiy metodik ishlanmalari muhokama etib boriladi.
Institutda ta’lim mazmunini isloh qilish bo’yicha ham samarali ishlar olib borilmoqda. Bevosita institut olimlari ishtirokida 1999-2001 yillarda umumiy o’rta ta’limning 23 akademik litsey, kasb-hunar kollejlarining 16 sohasi bo’yicha Davlat ta’lim standartlari, maktabgacha yoshdagi bolalar ta’lim-tarbiyasiga qo’yiladigan davlat talablari ishlab chiqilgan. Mazkur standartlarni modernizatsiyalashtirish va hayotga tatbiq etish bo’yicha o’quv dasturlari, darslik va qo’llanmalar ishlab chiqishda, maktab ta’limini rivojlantirish Davlat umummilliy dasturini bajarishda ham institut olimlari faollik ko’rsatmoqdalar.
Institutga turli yillarda sobiq Ittifoq Pedagogika Fanlari Akademiyasi akademiklari va muxbir a’zolari S.Rajabov, E.Qodirov, M.Hamroev, S.Shermuxamedov kabi xalq ta’limining taniqli tashkilotchilari va olimlari rahbarlik qilganlar. 2004 yildan buyon pedagogika fanlari oktori, professor R.X.Jo’raev institutda rahbarlik qilmoqda.

2006 yildan boshlab O’zbekiston Respublikasi Vazirlar Mahkamasi huzuridagi ilmiy-texnikaviy taraqqiyotni muvofiqlashtirish kengashi Fan va texnologiyalar markazining davlat buyurtmasi asosida institutda 3 yo’nalish bo’yicha ilmiy-amaliy va innovatsion tadqiqotlar olib borildi hamda 2005 yilda samarali yakunlandi.
1. Maktab ta’limini rivojlantirish Davlat umumilliy dasturi talablari asosida modernizatsiyalashtirilgan badiiy ta’lim mazmunini ishlab chiqishning didaktik asoslari (pedagogika fanlari nomzodi A.P.Sulaymonov).
2. Umumiy o’rta ta’lim maktablarida shaxsga yo’naltirilgan ta’lim va tarbiyaning ilmiy-pedagogik asoslari: Zamonaviy texnologiyalar roli muammosi (p.f.d. professor V.I.Andrianova)
3. Umumiy o’rta ta’lim maktablari o’quvchilarida g’oyaviy immunitetni shakllantirishning pedagogic asoslari (pedagogika fanlari doktori I.Q.Tolipov).
Hozirgi kunda va ta’lim tizimini takomillashtirishning pedagogik, psixologik muammolari yuzasidan istiqbolli tadqiqotlar loyihalari ustida maqsadli ishlar olib borilmoqda.
Institut tarkibida «Pedagogika va psixologiya», «Umumiy o’rta ta’lim mazmuni prognostikasi», «Tabiiy fanlarni o’qitish nazariyasi va metodikasi», «Ijtimoiy gumanitar fanlarni o’qitish nazariyasi va metodikasi», «Ta’lim texnologiyalari va kasbga yo’llash», «Boshlang’ich ta’lim nazariyasi va metodikasi» bilimlari mavjud. Shuningdek, institut muassisligida «Xalq ta’limi», «Uzluksiz ta’lim», «Fizika, matematika va informatika» nomli ilmiy-metodik jurnallar nashr ettirilib, uning sahifalarida uzluksiz ta’limning konseptual-metodik muammolari, ta’lim mazmuni va metodikasini takomillashtirish yuzasidan materiallar e’lon qilib boriladi.

Institut manzili: 700027, Toshkent shahri, O’zbekiston ko’chasi, 98-uy.

Respublika ta’lim markazi

n.tursunova — Wed, 21 Apr 2010 04:21:55 +0000

1989 yildan Respublika O’quv-metodik markazi tashkil etilgan. 1995 yilda Respublika O’quv-metodika markazi tugatilib, bu markaz «Respublika Ta’lim ilmiy metodika markazi» deb yuritilgan. 1996 yildan boshlab ushbu markaz «Respublika Ta’lim markazi» deb nomlangan. Respublika Ta’lim markazi O’zbekiston Respublikasi Xalq ta’limi vazirligining 2004 yil 10 dekabrdagi 261-sonli buyrug’i bilan tasdiqlangan «Respublika Ta’lim markazi to’g’risida»gi Nizomga binoan ta’lim muassasalarining metodik ta’minotini amalga oshiruvchi Davlat metodik tashkiloti hisoblanib, O’z faoliyatida O’zbekiston Respublikasi Xalq ta’limi vazirligiga bo’ysinadi.
Markaz O’zbekiston Respublikasi Xalq ta’limi vazirligi tasarrufidagi muassasa bo’lib, o’z faoliyati davomida O’zbekiston Respublikasi Konstitutsiyasi, Oliy Majlis qabul qilgan qonunlar, Prezident farmonlari, qarorlari va ko’rsatmalari, «Ta’lim to’g’risida»gi qonun, Xalq ta’limi vazirligining qaror, buyruq va ko’rsatmalari hamda Nizomga amal qiladi. Markaz O’zbekiston Respublikasi Xalq ta’limi vazirligi tomonidan 2005 yil 18 yanvarda tasdiqlangan Ustavga ega. Markaz yuridik shaxs hisoblanib, O’zbekiston Respublikasining Davlat tamg’asi aks etgan muhr, shtamp, Respublika Markaziy bankining tegishli bo’limida hisob raqamiga ega. «Kadrlar tayyorlash milliy dasturi»ning asosiy tamoyillari va maqsadli yo’nalishlarini amalga oshirish, umumiy O’rta ta’lim maktablari, maktabdan tashqari ta’lim muassasalarini o’quv reja, dastur, xalqimizning boy madaniy-tarixiy merosi, milliy va umuminsoniy qadriyatlari asosida o’quvchilarni ma’naviy-axloqiy ruhda tarbiyalash maqsadiga yo’naltirilgan o’quv-metodik adabiyotlar bilan ta’minlash Markazning muhim vazifasi hisoblanadi. Markaz Xalq ta’limi vazirligining boshqarma va bo’limlari, O’zbekiston pedagogika fanlari ilmiy-tadqiqot instituti, xalq ta’limi muassasalari, pedagogika oliy o’quv yurtlari, pedagogik xodimlarni qayta tayyorlash va malakasini oshirish institutlari hamda boshqa ta’lim muassasalari bilan hamkorlikda faoliyat ko’rsatadi. Markaz ta’lim, fan, texnika va texnologiya, iqtisodiyot va madaniyat yutuqlarini inobatga olgan holda ta’lim muassasalarini zamonaviy o’quv reja, dastur, darslik va metodik adabiyotlar bilan ta’minlaydi. Markaz 18 bo’limdan tashkil topgan bo’lib, Markazning asosiy vazifasi va yo’nalishlari quyidagilardan iborat: Qoraqalpog’iston Respublikasi Xalq ta’limi vazirligi, Toshkent shahar Xalq ta’limi Bosh boshqarmasi, viloyatlar xalq ta’limi boshqarmalari tasarrufidagi Metodika markazlariga, tuman (shahar) metodika kabinetlariga, ta’lim muasasalariga «Ta’lim to’g’risida»gi qonun, «Kadrlar tayyorlash milliy dasturi», «2004-2009 yillarda maktab ta’limini rivojlantirish Davlat umummilliy dasturi», Davlat ta’lim standartlari talablari asosida ta’lim jarayonini takomillashtirish, ta’lim-tarbiya sifati va samaradorligini oshirish borasida metodik xizmat ko’rsatadi; Viloyat metodika markazlari va tuman (shaqar) metodika kabineti metodistlari, umumiy O’rta ta’lim maktab o’qituvchilarining ilg’or pedagogik tajribalarini o’rganadi, ommalashtiradi; Ijtimoiy va ilmiy-texnik taraqqiyot talablariga javob beradigan ta’limning yangi shakllari, ilg’or pedagogik va axborot texnologiyalarini ta’lim jarayoniga tatbiq etadi; Ta’lim muassasalarida Davlat ta’lim standartlari, O’quv reja va dasturlarning talab darajasida bajarilishini, ta’lim-tarbiyaning qo’yilish ahvolini o’rganadi, aniqlangan kamchiliklarni bartaraf etish bo’yicha ko’rsatmalar beradi; Yangi yaratilgan dastur, darslik, o’quv-ko’rsatmali qo’llanmalar, didaktik materiallarni ekspertiza qiladi; Umumiy O’rta ta’lim va maktabdan tashqari ta’lim muassasalari, maktab metodbirlashmalari, tuman (shahar) metodika kabinetlari tajribalariga oid materiallarni, metodik tavsiyalarni nashrga tayyorlaydi; Ta’lim-tarbiya masalalariga oid Respublika anjumani, ilmiy-amaliy seminar va boshqa tadbirlarni tashkil etadi; Umumiy O’rta ta’lim maktablari uchun o’quv-ko’rsatmali qo’llanmalar, o’quv videofilmlari va videofragmentlar, proyeksion plakatlar yaratish ishlarini tashkil etadi; Belgilangan tartibda O’zbekistonda ta’lim yo’nalishida faoliyat ko’rsatayotgan xalqaro tashkilotlar bilan aloqa o’rnatadi; Ta’lim-tarbiyaga oid muhim muammolar yuzasidan tajriba-sinov ishlarini olib boradi, pedagogik fan yutuqlarini ta’lim muassasalari amaliyotiga joriy etishga yo’naltirilgan tadbirlar o’tkazadi; Fan yo’nalishlari bo’yicha ilmiy metodik kengashlar tashkil etadi va ularning samarali faoliyat ko’rsatishini ta’minlaydi; Xalq ta’limi vazirligi buyrug’i asosida O’quv dasturlari va darsliklar tanlovini tashkil etishda qatnashadi; Ekspertlarni jalb etib O’quv dasturlari va darsliklarni ekspertizadan o’tkazadi; Xalq ta’limi vazirligining tegishli boshqarma va bo’limlari, boshqa manfaatdor tashkilotlar bilan hamkorlikda O’quvchilarning Respublika fan olimpiadalarini, ko’rik-tanlovlarini o’tkazadi; Markaz tarkibi o’z maqsad va vazifalarini bajarish uchun faoliyat ko’rsatuvchi bo’lim, sektorlardan shuningdek, umumiy ishlar va bo’linmalardan iborat.

Respublika Ta’lim markazi manzilgohi: Toshkent shahri Chilonzor tumani, Furqat ko’chasi, 174-uy.

O’zbekiston Ingliz tili O’qituvchilari Assosiatsiyasi – UzTEA

m.turdalieva — Mon, 19 Apr 2010 05:52:20 +0000

O’zbekiston Ingliz tili O’qituvchilari Assosiatsiyasi – UzTEA – 1996 yilda tashkil qilingan bo’lib, bugungi kunda mamlakat bo’ylab 14 ta filiali faoliyat ko’rsatib kelmoqda. UzTEA (Uzbekistan Teachers of English Association) ning bosh maqsadi – O’zbekistonda ingliz tilini o’rgatish mahoratini rivojlantirish, o’rgatuvchilarni zaruriy o’quv vositalari va materiallari bilan ta’minlash, shuningdek ingliz tilini o’rgatish haqidagi bilimlarini boyitish hisoblanadi. Shuning uchun UzTEA muntazam ravishda fikrlar va tajriba almashinish maqsadida turli forumlar, Ingliz tili o’qitish metodikasi va lingvistika yo’nalishida doimiy tarzda seminarlar, konferensiyalar va kurslar tashkil qiladi. UzTEAga qaysi dargohda ta’lim berishidan qat’iy nazar har qanday darajadagi ingliz tili o’qituvchilari(boshlang’ich, o’rta ta’lim, o’rta maxsus ta’lim, oliy ta’lim) va o’qituvchi bo’lish arafasida turganlar ham a’zo bo’lishlari mumkin.Statistik ma’lumotlarga ko’ra, UzTEAga 1000 dan ziyod o’qituvchilar doimiy a’zo hisoblanishadi. Assosiatsiya har yili a’lo darajada faoliyat olib borayotgan o’qituvchilar uchun Ingliz Tili O’qitishda Yuksak Mahorat (Teaching English Excellence Award) Mukofotini ta’sis etadi. Mukofotga Britaniya Kengashi homiylik qiladi va mustahkam hamkorlik ishlarini olib boradi. Jumladan, 2002 yilda UzTEA Samarqand va Farg’ona filiallari Britaniya Kengashi loyihasi doirasida Ingliz tilini o’qitish vositalari bilan ta’minlangan resurs markazga ega bo’ldi.Bundan tashqari Britaniya Kengashi UzTEA a’zolari uchun beminnat mutaxassis maslahatlarini berib boradi .
UzTEA quyidagi shaharlarda filiallariga ega:
• Toshken(Milliy bosh ofis)
• Samarqand
• Farg’ona
• Buxoro
• Jizzax
• Qo’qon
• Qarshi
• Namangan
• Navoiy
• Guliston
• Termez
• Angren
• Urganch
Qo’shimch ma’lumotlar uchun www.uztea.uz ga murojaat eting.

Gulhayo Qobilova.